Kryeministri i Kosovës Albin Kurti deklaroi sot se nuk pret që me ardhjen e presidentit të ri Donald Trump do të ndryshojë qasja e SHBA-së ndaj Kosovës. Në një intervistë për gazetën spanjolle “El Mundo”, Kurti tha se Kosova punon ngushtë me Washingtonin dhe se ardhja e Trumpit nuk do të ndryshojë qëndrimin e SHBA-së ndaj vendit.
“Kosova mban një marrëdhënie të fortë bilaterale me Shtetet e Bashkuara, duke u bazuar në përkushtimin e saj të vazhdueshëm për sovranitetin tonë dhe integrimin tonë në BE dhe NATO. Gjatë mandatit të Trumpit, marrëveshjet ekonomike ndërmjet Kosovës dhe Serbisë ishin prioritet për të promovuar stabilitetin, ndërsa administrata e Bidenit forcoi institucionet demokratike në Ballkan. Edhe pse këto dallime reflektojnë ndryshime në qasje, nuk besoj se Shtetet e Bashkuara do të ndryshojnë qëndrimin e tyre ndaj Kosovës; Ne punojmë ngushtë me Washingtonin”, tha Kurti.
