Rrebesh i madh kritikash në Serbi nga media dhe jo vetëm për trajnerin dhe federatën për vlerësimin që i bënë pritjes në Shqipëri në ndeshjen e së shtunës e cila u mbyll në barazim pa gola.
Në një deklaratë zyrtare për mediat, Federata Serbe e quan sjelljen e tifozëve shqiptarë, padrejtësisht, si humbje për futbollin. Por vlerëson sjelljen e FSHF dhe presidentit Armand Duka, për trajtimin që iu bë kombëtares serbe.
“Përpara të vërtetës së shëmtuar, me të cilën u përballën lojtarët tanë në fushë, duam të theksojmë faktin se e gjithë ekspedita e Federatës së Futbollit të Serbisë, që nga minuta e parë deri në minutën e fundit të qëndrimit të tyre në kryeqytetin shqiptar, pati një pritje të jashtëzakonshme nga Federata e Futbollit të Shqipërisë dhe presidenti Armand Duka.
Që nga pritja në aeroport deri në nisjen nga Tirana, ndiem respekt dhe vëmendje. Me mirënjohje ndaj Federatës së Futbollit të Shqipërisë për mikpritjen gjatë qëndrimit tonë në Tiranë, dënojmë gjithçka që mund të dëgjohej dhe shihej nga tribunat e Stadiumit Kombëtar” tha federata serbe.
