Në një takim të zhvilluar sot, Presidenti i Republikës, Bajram Begaj, priti Ambasadorin e Bashkimit Evropian në Shqipëri, Silvio Gonzato, i cili i dorëzoi Raportin Vjetor të Komisionit Evropian për Shqipërinë, pjesë e Paketës së Zgjerimit 2025.
Gjatë bisedës, Begaj dhe Gonzato diskutuan mbi gjetjet e raportit dhe hapat e ardhshëm në procesin e negociatave të anëtarësimit të Shqipërisë në BE.
Presidenti Begaj vlerësoi mbështetjen e vazhdueshme të Delegacionit të BE-së dhe theksoi përkushtimin e institucioneve shqiptare për të vijuar me vendosmëri përmbushjen e prioriteteve të integrimit evropian.
Ai nënvizoi progresin e bërë gjatë vitit të fundit në hapjen e grupkapitujve të negociatave dhe theksoi rëndësinë e vijimit të reformave thelbësore për të përmbushur standardet e Bashkimit Evropian.
“Bashkëpunimi i ngushtë me institucionet evropiane është kyç për të përshpejtuar rrugën e Shqipërisë drejt anëtarësimit të plotë në BE,” tha Presidenti Begaj, duke e cilësuar procesin e integrimit një aspiratë kombëtare dhe strategjike që kërkon angazhim dhe unitet nga të gjitha institucionet dhe faktorët politikë dhe shoqërorë.
