Shtyrja e konstituimit të Kuvendit dhe e formimit të Qeverisë si pasojë e rinumërimit të votave, rrezikon futjen e vendit në krizë të re, të shkaktuar nga moszgjedhja e presidentit, vlerësojnë njohësit e zhvillimeve politike e juridike.
Derisa për Kuvendin e Qeverinë nuk priten vështirësi, sfiduese janë duke u parë çështja e presidentit – sigurimi i votave dhe tejkalimi i afateve.
Procesi i rinumërimit të votave nga zgjedhjet e 28 dhjetorit rrezikon të shtyjë për rreth një muaj certifikimin e rezultateve, e si pasojë edhe konstituimin e institucioneve.
Sipas afatit të përcaktuar nga vetë KQZ-ja, procesi pritet të përmbyllet brenda 10 ditësh.
