Policia belge ka bastisur Komisionin Evropian në një hetim që po shqyrton parregullsi të mundshme në shitjen e aseteve të pasurive të paluajtshme. Sipas dy personave të njohur me operacionin, Financial Times shkruan se kërkimet u kryen të enjten në mëngjes në ambiente të ndryshme të Komisionit në Bruksel, përfshirë departamentin e buxhetit.
Hetimi ka të bëjë me shitjen e pronave të patundshme të BE-së, thanë njerëzit, e cila u zhvillua gjatë mandatit të mëparshëm të Komisionit kur Johannes Hahn ishte komisioner i buxhetit. Hahn ishte përgjegjës për drejtimin e buxhetit prej 1 trilion eurosh të BE-së deri në vitin 2024.
Pas përfundimit të mandatit të tij, ai u emërua i dërguari special i BE-së për Qipron. Hetimi po drejtohet nga Zyra e Prokurorit Publik Europian (EPPO) dhe ka të bëjë me 23 ndërtesa që u blenë nga fondi sovran belg i pasurisë, SFPIM, për 900 milionë euro në vitin 2024.
Në atë kohë, Komisioni tha se shitja u bë në përputhje me rregulloren financiare të BE-së. “EPPO-ja mund të konfirmojë se po kryen aktivitete për mbledhjen e provave në një hetim që është në vazhdim”, tha zëdhënësja e EPPO-së, Tine Hollevoet.
“Nuk ka asgjë tjetër që mund të ndajmë në këtë fazë, në mënyrë që të mos rrezikojmë procedurat në vazhdim dhe rezultatin e tyre”.
Një zëdhënës i Komisionit tha se “shitja e ndërtesave ndoqi procedurat dhe protokollet e përcaktuara dhe ne jemi të bindur se procesi u zhvillua në një mënyrë të pajtueshme”, duke shtuar se ekzekutivi i BE-së “do të bashkëpunojë plotësisht me EPPO-në dhe autoritetet kompetente belge për këtë çështje”.
Olaf, organi mbikëqyrës i BE-së kundër mashtrimit, nuk pranoi të komentojë, ashtu si edhe policia federale belge.
