Në përfundim të procesit të zgjedhjeve për kryetarin e degës së Partisë Demokratike në Vlorë, Nadire Meçorapaj është shpallur fituese.
Ajo mori gjithsej 496 vota, duke lënë pas konkurenten e saj Darling Banushaj, e cila siguroi 106 vota. Sipas numërimit përfundimtar, janë regjistruar gjithsej 13 vota të pavlefshme.
Pas shpalljes së rezultatit, Nadire Meçorapaj falënderoi anëtarët e PD-së në Vlorë për mbështetjen e dhënë dhe theksoi angazhimin e saj për të drejtuar degën me përgjegjësi dhe përkushtim.
Ajo shprehu dëshirën e saj për të çuar përpara misionin e PD-së, duke u fokusuar në forcimin e partisë dhe rikthimin e saj në pushtet në nivel lokal.
Meçorapaj u shpreh se është e gatshme për të marrë përsipër sfidat e ardhshme dhe se është e bindur që Partia Demokratike ka mundësinë të rikthejë besimin e qytetarëve të Vlorës, përmes një qeverisjeje të drejtë dhe të ndershme.
Ky rezultat vjen pas një procesi zgjedhor që u zhvillua në një atmosferë të qetë dhe demokratike, ku të gjithë anëtarët e partisë morën pjesë në votim për të zgjedhur udhëheqësin e ri të degës.
