Zhvillimet e fundit mes Shteteve të Bashkuara dhe Iranit, së bashku me rikthimin e qarkullimit në Ngushticën e Hormuzit, kanë sjellë një lehtësim të përkohshëm në tregjet globale të naftës.
Kështu është shprehur kryetari i Shoqatës së Naftëtarëve të Kosovës, Fadil Berjani, i cili thekson se rënia e shqetësimeve për ndërprerje të furnizimit ka reflektuar menjëherë në stabilizimin e çmimeve.
Sipas tij, treguesit kryesorë ndërkombëtarë kanë shfaqur luhatje më të qëndrueshme gjatë orëve të fundit.
Megjithatë, ai paralajmëron se kjo situatë mbetet e brishtë dhe se çdo ulje e mëtejshme e çmimeve varet nga vazhdimësia e qetësisë në rajon.
Berjani shton se një stabilitet i qëndrueshëm në tregun e naftës, me ndikim edhe në Kosovë, do të kërkonte një marrëveshje afatgjatë mes palëve të përfshira.
