Sot, 26.600 maturantë në të gjithë vendin do të zhvillojnë provimin e parë të Maturës Shtetërore, atë të Gjuhës Shqipe dhe Letërsisë. Provimi do të nisë në orën 10:00 dhe do të zgjasë 2 orë e 30 minuta.
Në mbarë vendin, procesi zhvillohet në 144 qendra provimi në shkolla, ku për mbarëvajtjen e tij janë angazhuar 2,087 mësues administratorë dhe 170 monitorues nga Ministria e Arsimit.
Ministria e Arsimit rikujton se gjatë provimit është e ndaluar përdorimi i telefonave, orëve smart apo çdo pajisjeje tjetër inteligjente, si dhe çdo material tjetër i palejuar. Po ashtu, nuk lejohet biseda me nxënës të tjerë apo kopjet.
Nxënësit duhet të kenë me vete një dokument identifikimi, si letërnjoftim ose pasaportë, si dhe mjetet e nevojshme shkollore për zhvillimin e provimit.
Provimet e tjera të Maturës Shtetërore do të zhvillohen më 16 qershor për Matematikën dhe më 23 qershor për provimin me zgjedhje.
