Donald Trump , gjatë një konference për shtyp pas Samitit të NATO-s në Ankara, tha se pati një “përvojë të shkëlqyer”, duke e përshkruar takimin e udhëheqësve si “shumë të suksesshëm”.
Presidenti amerikan foli për “dashuri të jashtëzakonshme në dhomë” gjatë diskutimeve me dyer të mbyllura të udhëheqësve në margjinat e Samitit. “Është për të ardhur keq që shtypi nuk mundi të shihte atë që bëmë, sepse atje kishte shumë njerëz shumë, shumë të zgjuar dhe ata kanë mirësi në zemrat e tyre – jo të keqe, por mirësi”, tha ai.
«Atyre u pëlqen puna që bëj», tha ai gjatë një konference për shtyp. «Ata thanë: ‘Zotëri, ne ju duam’. Kjo është ajo që thonë burrat e rritur, a nuk është bukur?»
Trump u përqendrua te shpenzimet e mbrojtjes, duke thënë se samiti i vitit të kaluar në Holandë ishte «i pashembullt», pasi vendet ranë dakord të rrisnin shpenzimet vjetore të mbrojtjes nga 2 përqind në 5 përqind të PBB-së.
«Shumica e vendeve kanë rënë dakord», tha Trump. «Ka disa që nuk e kanë bërë, por kam një ndjenjë se do ta bëjnë, dhe shumë shpejt», shtoi ai.
Ai tha se bisedimet në Ankara kishin të bënin me progresin e shteteve anëtare drejt objektivit prej 5%.
“Shumë nga këto vende janë shumë të pasura, meqë ra fjala. Nuk kemi pse të ndiejmë keqardhje për to, por kjo nuk do të thotë se ato janë të mbrojtura siç duhet”, përfundoi presidenti amerikan.
Trump preku një sërë çështjesh gjatë konferencës për shtyp, nga tarifat te Meksika e deri te TikTok – përpara se të kthehej në samitin e NATO-s.
Presidenti amerikan tha se industritë e mbrojtjes amerikane do të jenë përfitueset e mëdha të përpjekjeve të vendeve evropiane për të forcuar aftësitë e tyre ushtarake.
“Ata duan pajisje amerikane sepse funksionojnë më mirë. Nuk ka të bëjë me asgjë tjetër. Ne prodhojmë pajisjet më të mira në botë”, tha ai.
