dënim Archives - 5 Pyetjet

Syla: Besojmë në pafajësinë e Gjelosh Krasniqit, dënimi nga Beogradi është i pabazë

Erisilda Meta — Fri, 27 Feb 2026 15:18:49 +0000

Nënkryetari i OVL-UÇK-së Gazmend Syla ka reaguar pas vendimit të Gjykatës së Beogradit, e cila ka dënuar në mungesë bashkëluftëtarin e tij Gjelosh Krasniqin me 15 vjet burgim. Syla e konsideron këtë dënim të pabazë dhe i hedh poshtë akuzat e Serbisë, duke e cilësuar sulm të qëllimshëm ndaj figurës dhe luftës së pastër të UÇK-së.

Syla tha në Klan Kosova se: Lufta jonë ka qenë e drejtë. UÇK-ja nuk ka bërë krime. Jemi krenarë me çdo luftëtar të UÇK-së. Me luftën speciale të Serbisë jemi duke u ballafaquar çdo ditë prej ditës së çlirimit të Kosovës.

Ai shtoi se dënimi ndaj Krasniqit nuk është i ri, duke argumentuar se Serbia vazhdimisht tenton të njollosë luftën e pastër të UÇK-së. Syla gjithashtu theksoi lidhjen familjare të Gjelosh Krasniqit me historinë e luftës: Gjelosh Krasniqi, përveç që vetë doli në mbrojtje të vendit në kohën më të vështirë, është edhe vëllai i dëshmorit, Gjergj Krasniqi.

Gjykata e Beogradit dënon me mungesë ish-pjesëtarin e UÇK-së me 15 vjet burg

The post Syla: Besojmë në pafajësinë e Gjelosh Krasniqit, dënimi nga Beogradi është i pabazë appeared first on 5 Pyetjet.

‘Hakmarrje për vëllanë’- Tentuan ta vrasin, dënohen 50 vite burg

Dyli — Fri, 27 Feb 2026 12:30:39 +0000

Dy persona L.H dhe M.M janë dënuar secili me 25 vite burg, për veprën penale “Vrasje në rrethana cilësuese”, e mbetur në tentativë. Shtetasi L.H donte të vriste një person, si hakmarrje për vrasjen e vëllait të tij.

Njoftimi i Prokurorisë:

Me kërkesë të Prokurorisë Fier, dënohen me 25 vite burgim secili shtetasit L.H. dhe M.M. për ‘Vrasje në rrethana cilësuese’ e mbetur në tentativë

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Fier, u shpallën fajtorë dhe u dënuan me 25 vite burgim, shtetasit L.H. dhe M.M. për veprat penale ‘Vrasja në rrethana cilësuese’ në mënyrë të rrezikshme për jetën e shumë personave, e kryer në bashkëpunim, mbetur në tentativë, parashikuar nga neni 79, gërma ‘ë’, 25 dhe 22 të Kodit Penal dhe ‘Mbajtja pa leje dhe prodhimi i armëve, armëve shpërthyese dhe i municionit’ parashikuar nga neni 278/1 i Kodit Penal.

Në përfundim të hetimit dhe gjykimit mbi procedimin penal nr. 150/2023, me të pandehur shtetasit L. H. dhe M.M. Prokuroria pranë Gjykatës së Shkallës së Parë të Juridiksionit të përgjithshëm, Fier arriti të provojë se i pandehuri L.H., me qëllim për t’u hakmarrë ndaj vrasjes së vëllait të tij R.H., ka bashkëpunuar me të pandehurin M.M., të cilit i ka porositur eleminimin fizik të shtetasit M.H. Në datë 30.03.2023, rreth orës 16.00, në vendin e quajtur “Pisha”, fshati Garunjë, Lushnjë, i pandehuri M.M., pasi është informuar mbi targën e automjetit me të cilin udhëtonte shtetasi R.H., ka siguruar armën e zjarrit e ka përgatitur vendin nga do shtinte, ka qëlluar njëmbëdhjetë herë në drejtim të këtij mjeti. Si pasojë e sulmit ka mbetur e plagosur shtetasja B.S., pasagjere në vendin e parë të mjetit. Shtetasi M.H., shënjestra e sulmit, ka kuptuar sulmin dhe ka shtuar shpejtësinë duke bërë të mundur largimin e mjetit.

Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë dhe vënien para përgjegjësisë ligjore të personave që kryejnë vepra penale kundër jetës dhe shëndetit.

The post ‘Hakmarrje për vëllanë’- Tentuan ta vrasin, dënohen 50 vite burg appeared first on 5 Pyetjet.

Vrau Martin Canin, Mario Përlleshaj ankimon dënimin me 16 vite burg

Erisilda Meta — Thu, 19 Feb 2026 11:55:13 +0000

Marjo Përlleshaj, i akuzuari për vrasjen e Martin Canit, ka ankimuar në gjykatën e apelit dënimin prej 16 vitesh burg që iu dha nga shkalla e parë.

Avokati i Përlleshajt argumenton se akuzat e ngritura për vrasje në rrethana cilësuese nuk janë të bazuara dhe se ngjarja ndodhi si pasojë e një vetëmbrojtjeje të kërkuar nga situata dhe tronditjes psikologjike që ai ka kaluar në momentin e ngjarjes.

Në ankesën e tij, mbrojtja ka theksuar se Përlleshaj ka vepruar nën ndikimin e një tronditjeje të fortë psiqike, dhe kërkon që kjo të merret parasysh si faktor lehtësues. Po ashtu, argumentohet se kjo mbrojtje ishte paraqitur edhe në gjykatën e shkallës së parë, por nuk është marrë parasysh nga gjyqtarët.

Në dhjetor të vitit të kaluar, Përlleshaj u dënua me 12 vite burg për vrasjen e Martin Canit dhe 10 vite për tentativën e vrasjes së shokut të tij, Luis Mecaj, ngjarje që ndodhi në shkollën “Fan Noli”. Pasi përfundoi procesi gjyqësor, ai u dënua me 16 vjet burg për të dyja akuzat.

Ngjarja tronditëse ndodhi kur, gjatë një konflikti mes të miturve, një prej tyre, Përlleshaj, përdori thikën, duke i shkaktuar vdekjen Martin Canit dhe plagosjen e rëndë Luis Mecaj. Pas hetimeve, prokuroria ngriti akuzën për vrasje dhe plagosje të rëndë, por gjykata e shkallës së parë nuk e pranoi kërkesën për një dënim maksimal.

Me ankimimin e vendimit, Përlleshaj kërkon zbutjen e dënimit në apel dhe një shqyrtim më të detajuar të rrethanave që sollën ngjarjen.

The post Vrau Martin Canin, Mario Përlleshaj ankimon dënimin me 16 vite burg appeared first on 5 Pyetjet.

Gucati: Kërkesa për dënim ndaj krerëve të UÇK-së është skandaloze

Erisilda Meta — Mon, 09 Feb 2026 15:51:17 +0000

Në Prishtinë, disa nga veteranët e Ushtrisë Çlirimtare të Kosovës (UÇK) janë mbledhur për të ndjekur zhvillimet më të fundit në procesin gjyqësor ndaj ish-krerëve të UÇK-së.

Gjatë kësaj seance, kryetari i Organizatës së Veteranëve të Luftës së Ushtrisë Çlirimtare të Kosovës (OVL-UÇK), Hysni Gucati, ka shprehur shqetësimin dhe konsideratën e tij për kërkesën e kryeprokurores Kimberly West për dënim të gjatë ndaj liderëve të UÇK-së.

Ndërkohë, liderët politikë të Kosovës kanë vazhduar të shprehin besimin e tyre në pafajësinë e ish-krerëve të UÇK-së dhe në luftën e drejtë për liri dhe pavarësi.

“Tashmë pritet që drejtësia ndërkombëtare, në mënyrë të paanshme dhe të pandikuar, të marrë vendimin e saj përfundimtar. Ne besojmë në pafajësinë e Hashim Thaçit, Kadri Veselit, Jakup Krasniqit dhe Rexhep Selimit, sepse besojmë në të vërtetën historike dhe në luftën e drejtë të popullit të Kosovës për liri dhe pavarësi. Ky proces nuk përfaqëson vetëm një akt juridik, por është edhe një provë e ndërgjegjes ndërkombëtare ndaj së vërtetës”.

The post Gucati: Kërkesa për dënim ndaj krerëve të UÇK-së është skandaloze appeared first on 5 Pyetjet.

Osmani: Lufta e UÇK-së ishte e drejtë, çdo barazim me krimet serbe dëmton drejtësinë

Erisilda Meta — Mon, 09 Feb 2026 14:57:00 +0000

Presidentja e Kosovës, Vjosa Osmani, ka reaguar në rrjetet sociale lidhur me tentativat për të barazuar luftën çlirimtare të Ushtrisë Çlirimtare të Kosovës (UÇK) me krimet e Serbisë gjatë luftës së fundit.

Ajo ka theksuar se çdo përpjekje për të shpërfillur historinë dhe luftën për liri të popullit të Kosovës dëmton rëndë besimin në drejtësi dhe paqe.

Postimi i Osmanit:

Pavarësia e Kosovës ishte vullnet i popullit të Kosovës. Ishte sakrificë shekullore për të cilën dhanë jetën mijëra dëshmorë e civilë të pafajshëm e për të cilën luftuan, me heroizëm dhe me luftë të pastër, Ushtria Çlirimtare e Kosovës.

Gjenocidi, krimet kundër njerëzimit dhe krimet e luftës janë krime që Serbia i kreu kundër popullit të Kosovës ndër shekuj.

Gjatë luftës së fundit në Kosovë, Serbia kishte për qëllim shfarosjen e popullit shqiptar, qëllim të cilin e shpërfaqi nëpërmjet vrasjes dhe masakrimit të mijërave fëmijëve, grave, burrave e të moshuarve, dhunimeve të mijëra grave e burrave, shkatërrimit të qindra mijëra shtëpive, dëbimit të mbi 80% të qytetarëve të Kosovës nga shtëpitë e tyre, spastrimit etnik, zhdukjes me dhunë të mijëra personave dhe krimeve të tjera të llahtarshme.

Çdo përpjekje që tenton të barazojë luftën çlirimtare të UÇK-së me krimet e agresorit gjenocidal serb e minon besimin në drejtësi dhe e dëmton rëndë paqen afatgjatë.

Kosova dhe qytetarët e saj kërkojnë drejtësi. Lufta e UÇK-së ishte e drejtë dhe e pastër. Kjo e vërtetë nuk ndryshohet me tentime për ta rishkruar historinë dhe për ta njollosur dhe zhvleftësuar betejën e popullit të Kosovës për liri.”

The post Osmani: Lufta e UÇK-së ishte e drejtë, çdo barazim me krimet serbe dëmton drejtësinë appeared first on 5 Pyetjet.