Ky aktivitet shërben si një hapësirë ku të rinjtë kanë mundësinë të shprehin aftësitë e tyre krijuese dhe kërkimore përmes projekteve dhe eksperimenteve shkencore, duke u përballur njëkohësisht me sfidën e prezantimit dhe argumentimit të ideve të tyre përpara specialistëve të fushës. Festivali zhvillohet në disa faza, duke nisur nga niveli i shkollave, për të vijuar në nivel vendor dhe rajonal, deri në finalen kombëtare ku përzgjidhen projektet më cilësore.

Në këtë kuadër, ditën e sotme, në ambientet e palestrës së shkollës “Foto Puka”,Lushnjë u zhvillua faza e dytë e Festivalit Kombëtar të Shkencës për ZVAP Lushnjë, ku morën pjesë 14 shkolla të mesme të këtij territori arsimor.

Skuadrat e shkollave pjesëmarrëse prezantuan përpara jurisë projektet e tyre të realizuara në përputhje me udhëzuesin e festivalit, duke paraqitur ide inovative dhe qasje kërkimore në fusha të ndryshme si biologjia, fizika, kimia dhe teknologjia. Prezantimet e nxënësve dëshmuan për një përgatitje serioze, përkushtim dhe aftësi analitike, duke reflektuar gjithashtu rolin e rëndësishëm të mësuesve në orientimin dhe mbështetjen e tyre.

Në hapje të aktivitetit përshëndeti drejtoresha e ZVAP Lushnjë, Arta Dhamo, e cila vlerësoi përfshirjen dhe angazhimin e nxënësve dhe të mësuesve në këtë nismë arsimore, duke theksuar se aktivitete të tilla përbëjnë një nxitje të rëndësishme për zhvillimin e kulturës shkencore dhe të mendimit kritik tek brezi i ri.

Projektet u vlerësuan nga një juri e përbërë nga përfaqësues të institucioneve arsimore dhe specialistë të fushës, të cilët shqyrtuan me kujdes çdo prezantim sipas kritereve të përcaktuara në udhëzuesin e festivalit.

Në përfundim të këtij aktiviteti u shpallën fituese projektet:

1. “Waves Don’t Die” – shkolla “18 Tetori”.
2. “Shtëpia ekologjike” – shkolla “Vath Koreshi”.

Festivali Kombëtar i Shkencës mbetet një platformë e rëndësishme për promovimin e talenteve të reja dhe për forcimin e lidhjes së të rinjve me botën e kërkimit shkencor, duke kontribuar në formimin e një brezi të ri të orientuar drejt dijes, inovacionit dhe zhvillimit.

The post Ide inovative nga brezi i ri/ Festivali i Shkencës vendos në garë gjimnazistët appeared first on 5 Pyetjet.