Policia serbe ka lëshuar një urdhër për arrestimin e tij pas një incidenti në Mitrovicën e Veriut gjatë një feste të maturantëve të komunitetit serb.

Predrag Petroviq, nga Qendra për Politika të Sigurisë në Beograd (BCBP), tha për Radion Evropa e Lirë se ky urdhër është akt politik dhe propagandistik.

“Qëllimi i tij është t’i dërgohet një mesazh opinionit serb se shteti i Serbisë dhe institucionet kujdesen kinse për sigurinë e serbëve në Kosovë”, tha ai.

Megjithatë, Petroviq shton se arrestimi i policit kosovar është “shumë, shumë joreal”.

Më 24 maj, Ministria e Punëve të Brendshme e Serbisë njoftoi se Brahimi do të arrestohej “kurdo që të jetë i qasshëm për autoritetet serbe, pa parashkrim”.

Një ditë më vonë, ministri i Punëve të Brendshme i Serbisë, Ivica Daçiq, deklaroi në televizionin Prva se urdhri për arrestim është i rëndësishëm si reagim institucional.

“Në momentin që ai bëhet i qasshëm për autoritetet shtetërore të Serbisë, ai do të arrestohet”, tha Daçiq.

Sipas Petroviqit, në praktikë kjo do të thotë se zyrtari i Policisë së Kosovës mund të arrestohet vetëm nëse ndodhet në territorin e Serbisë – gjë që, sipas tij, është shumë pak e mundshme.

Çfarë thonë në Prishtinë?

Drejtori i Policisë së Kosovës, Gazmend Hoxha, e cilësoi urdhrin për arrestim të lëshuar nga autoritetet serbe në “vazhdën e përndjekjeve të policëve të Kosovës”.

“Kemi pasur raste që policë tanë janë arrestuar në Serbi. Ne i përgjigjemi vetëm gjykatave tona, por jo autoriteteve serbe”, tha Hoxha më 25 maj, gjatë një konference për media.

Në prill 2024, autoritetet serbe ndaluan zëvendësdrejtorin e Policisë së Kosovës nga komuniteti serb, Dejan Jankoviq, bashkë me katër zyrtarë të tjerë policorë. Të nesërmen, ata u liruan, ndërsa autoritetet kosovare thanë se Jankoviq ishte akuzuar për “cenim të rendit kushtetues të Serbisë”.

Serbia nuk e njeh pavarësinë e Kosovës, por përmes ndërmjetësimit të Bashkimit Evropian është përfshirë në bisedime për normalizimin e marrëdhënieve me Prishtinën zyrtare.

Ndërkohë, edhe një ndalim tjetër
Ministria e Punëve të Jashtme dhe Diasporës e Kosovës njoftoi se autoritetet serbe kanë ndaluar më 26 maj Gramos Agushollin, ish-deputet i Lëvizjes Vetëvendosje, teksa ishte në tranzit drejt Sllovenisë në pikën kufitare në Merdarë.

MPJD e ka cilësuar arrestimin si “arbitrar” dhe ka kërkuar reagimin e bashkësisë ndërkombëtare. Ndërkohë, autoritetet serbe nuk kanë dhënë ndonjë koment publik për këtë rast.

Disa orë më vonë, Ministria njoftoi se ai është liruar.

Çfarë ndodhi në Mitrovicën e Veriut?

Disa e akuzojnë policin për reagim selektiv dhe përdorim të forcës së tepruar, ndërsa të tjerë thonë se ai ka vepruar për të parandaluar një përshkallëzim të mundshëm të situatës.

Sipas videove që po qarkullojnë në rrjetet sociale, një grup maturantësh nga komuniteti serb po festonte mbarimin e vitit shkollor me një paradë nëpër qendër të qytetit, kur një polic ndaloi njërin prej tyre për shkak se, siç thuhet, kishte provokuar njerëzit në një kafene lokale aty pranë.

Në video shihet polici duke i vendosur dorën në qafë maturantit, ndërsa të pranishmit kërkojnë që ta lëshojë, duke thënë se i riu nuk kishte bërë asgjë.
Pikërisht ky gjest – mbajtja e dorës në qafën e të riut – ka ngjallur reagime, duke u cilësuar si përdorim i tepruar i forcës.

Në video të tjera shihet se gjatë defilimit, maturanti i kishte drejtuar gishtin e mesëm kafenesë, nga ku një person dyshohet se kishte bërë me duar simbolin e shqiponjës me dy koka – simbol i flamurit shqiptar.

Radio Evropa e Lirë nuk ka arritur të verifikojë saktësinë e pamjeve, kohën e xhirimit apo se kush e nisi incidentin.

Policia e Kosovës ka mohuar se ka pasur dhunë gjatë ndërhyrjes së saj, por tha se ka nisur një hetim kundër një zyrtari të vet të përfshirë në incident.

Drejtori i Policisë së Kosovës, Gazmend Hoxha, tha në një konferencë për media të dielën se zyrtari policor do të hetohet nga Inspektorati Policor i Kosovës dhe se, pas incidentit, ai është transferuar në stacionin policor në Mitrovicën e Jugut nga Mitrovica e Veriut.
Edhe Ministri i Punëve të Brendshme i Kosovës, Xhelal Sveçla, tha se policia ka vepruar në mënyrë profesionale për të parandaluar përshkallëzimin e situatës, pasi disa maturantë kishin përdorur simbole nacionaliste dhe thirrje si “Kosova është zemra e Serbisë”.

Kreu i misionit të BE-së për Sundimin e Ligjit në Kosovë (EULEX), Giovanni Pietro Barbano, ka dënuar përdorimin e tepruar të forcës nga ana e policisë.

Lista Serbe, partia më e madhe e serbëve në Kosovë e mbështetur nga Beogradi, ka kërkuar hetim dhe ndëshkim për zyrtarët policorë që kanë tejkaluar kompetencat.

Policët nga komuniteti serb u larguan nga institucionet e Kosovës në nëntor 2022, si pjesë e një largimi të organizuar. Në fillim ata u zëvendësuan kryesisht nga policë shqiptarë, ndërsa më vonë janë rekrutuar rreth 100 zyrtarë të rinj nga komuniteti serb dhe ai i pakicave të tjera./REL

The post REL: Urdhri i policisë serbe për arrestimin e policit të Kosovës, “shumë joreal” appeared first on 5 Pyetjet.

Prokurori i Shtetit Nenad Stefanoiç tha se Serbia ka kërkuar informacione nga Departamenti amerikan i Drejtësisë mbi dyshimet për keqpërdorim të fondeve të USAID-it dhe pastrim parash në Serbi, duke iu referuar deklaratave të Presidentit Trump, Sekretarit të Shtetit Marco Rubio, miliarderit Elon Musk si dhe zyrtarëve të tjerë amerikanë pas vendimit për ngrirjen e fondeve të USAID-it.

Departamenti i posaçëm kundër korrupsionit ka kërkuar nga policia “të mbledhë të gjitha të dhënat e zbulimit për të verifikuar informacionin dhe për të mbledhur prova mbi shpenzimet e dyshimta të fondeve të USAID-it, keqpërdorimit të fondeve dhe dyshimeve për pastrim parash”, tha prokurori Stefanoviç.

Policia është udhëzuar të mbledhë tërë dokumentacionin rreth donacioneve të USAID-it për katër organizata joqeveritare, tha ai.

Dy organizatat me seli në Beograd, Qendra për Hulumtime, Transparencë dhe Përgjegjësi, ‘CRTA’, si dhe Nisma Qytetare konfirmuan se forcat policore bastisën zyrat e tyre të martën.

CRTA, e cila bën vëzhgimin e pavarur të zgjedhjeve në Serbi, postoi në rrjetin X se “po bashkëpunonte plotësisht me autoritetet shtetërore”.

Organizata Nisma Qytetare e cilësoi bastisjen si një “sulm serioz kundër të drejtave themelore civile dhe vazhdimësi të trysnisë së jashtëligjshme ndaj shoqërisë civile në Serbi”.

“Përdorimi i policisë për qëllime politike paraqet një keqpërdorim të ashpër të institucioneve të shtetit për të goditur ata që mendojnë ndryshe dhe kufizim të aktiviteteve të lira dhe demokratike në Serbi”, thuhet në deklaratën e kësaj organizate.

The post Policia serbe bastis organizatat e shoqërisë civile të financuara nga USAID appeared first on 5 Pyetjet.

Kamberi shprehet se lista e Vulinit po vazhdon të aplikohet edhe më tej.

Ai thotë që “Serbia gjithnjë e më shumë po largohet nga vlerat perëndimore e aplikimi i demokracisë”.

“Sa keq për një shtet që pretendon të bëhet pjesë e BE-së”, shprehet Kamberi.

Kryetarja e Komunës së Preshevës, Ardita Sinani ndalohet në kufi nga policia serbe

The post Policia serbe ndalon Ardita Sinanin/ Kamberi: Serbia po largohet nga vlerat perëndimore appeared first on 5 Pyetjet.

Sinani shprehet se është ndaluar nga policia serbe pa asnjë paralajmërim dhe sqarim zyrtar dhe është kontrolluar edhe makina me të cilën ajo udhëtonte.

Kjo ngjarja ka ndodhur kur Sinani po kthehej nga një vizitë që i ka bërë komunës së Çairit në Shkup, mbi vendosjen e themeleve të bashkëpunimit midis dy komunave shqiptare asaj të Preshevës në Serbi dhe Çairit në RMV.

Ardita Sinani thotë që kjo ka ndodhur pasi është anagazhuar në Qeverinë e Kosovës si këshilltare e kryeministrit Kurti, e që në fakt kjo mund të jetë një përgjigje e Serbisë ndaj veprimtarisë së saj politike.

The post Kryetarja e Komunës së Preshevës ndalohet në kufi nga policia serbe appeared first on 5 Pyetjet.

“Ramoviç refuzoi të dorëzohej dhe qëlloi dy-tre plumba drejt policisë gjatë operacionit të arrestimit”, tha Daçiç, sipas njoftimit të Ministrisë së Brendshme të Serbisë.

Në njoftim u tha se Daçiç deklaroi se Ramoviç nuk ishte arrestuar në shtëpinë e tij në Hotkovo, por në një shtëpi aty pranë që i përkiste kunatit të tij, Aldin Birçoviç nga Novi Pazari, i cili aktualisht është duke vuajtur dënim në një burg në Nish.
Ai shtoi se Ramoviç po ashtu i kishte rezistuar policisë gjatë kontrolleve të kryera më herët.

Ministria e Brendshme serbe tha se Ramoviç ishte në arrati pas sulmit, që Serbia e cilëson terrorist, pranë Ambasadës izraelite në Beograd në qershor dhe madje në një kohë, ai ishte fshehur edhe në Kosovë.

“Ky veprim është në vazhdën e veprimeve të kryera pas aktit terrorist pranë Ambasadës izraelite në Beograd”, tha Daçiç.

Ai shtoi se aksioni për arrestimin e Ramoviçit, që rezultoi me vrasjen e tij, u krye në koordinim me Agjencinë për Siguri dhe Informacion (BIA), me MPB-në serbe dhe me Zyrën e Prokurorit të Lartë në Novi Pazar.

Më herët, autoritetet serbe thanë se Ramoviç ishte qiradhënësi i Millosh Zhujoviç, i cili më 29 qershor plagosi me shigjetë një polic që po ruante ndërtesën e Ambasadës izraelite. Roja ishte kundërpërgjigjur duke e vrarë sulmuesin.
Senad Ramoviç më herët kishte vuajtur një dënim në burgjet serbe prej 13 vjetësh e gjysmë burgim nën akuza për terrorizëm.

Ai ishte arrestuar më 2007, pas një përleshjeje të armatosur me policinë në një fshat afër Novi Pazarit, kur 14 nga bashkëpunëtorët e tij ishin arrestuar po ashtu.

Në korrik të vitit 2009, Këshilli Gjyqësor i departamentit të posaçëm të Gjykatës së Qarkut të Beogradit dënoi 12 të pandehur nga ky grup me më shumë se 60 vjet burgim, në lidhje me vepra terroriste dhe për planifikimin e vrasjes të myftiut të atëhershëm të bashkësisë islame të Serbisë, Muamer Zukorliç.

Në vendimin e gjykatës ishte thënë se të dënuarit kishin planifikuar sulme ndaj një xhamie dhe një stacioni policor në Novi Pazar.

Autoritetet po ashtu kishin thënë se ata kishin fshehur armë, ushqime dhe ilaçe në malin Ninaji, afër Novi Pazarit dhe kishin kryer trajnime edhe me antitanke.

Në vendim ishte thënë se të pandehurit kishin planifikuar të kryenin sulme terroriste në fund të vitit 2007 dhe në fillim të vitit 2008, me qëllim që të nxisnin frikë dhe pasiguri në mesin e qytetarëve./REL

The post Policia serbe vret një person të lidhur me sulmin pranë Ambasadës izraelite appeared first on 5 Pyetjet.