Maqedonia e Veriut ka vendosur të heqë detyrimet doganore për importin e vajit. Mirëpo, përkundër kësaj mase, çmimi mund të rritet duke pasur parasysh gjendjen e tregjeve evropiane dhe kostot e prodhuesve.
“Prandaj morëm një masë për heqjen e detyrimeve të importit për vajin e lulediellit, që qytetarët tanë të mos mbeten pa vaj gatimi, kur ja nuk kemi korrje të lulediellit. Nuk është qeveria ajo që i blen sasitë e vajit, ato janë kompanitë e ndryshme që duhet të gjejnë produkte të papërpunuara dhe të gatshme. Sapo të na informojnë për sasitë që i kanë siguruar, do të mund t’ju përgjigjem”, tha Fatmir Bytyqi- Zëvendës Kryeministër për çështjet ekonomike.
Vaji gatimit do të importohet pa taksa prej 29 për qind deri në fund të muajit të ardhshëm.
Prodhuesit vendas kanë rezerva edhe për një muaj pasi nuk mund të importojnë vaj nga Serbia, por javën e ardhshme qeveria në Beograd pritet të heqë ndalimin e eksporteve nga Serbia.
