Presidenti ukrainas Volodymyr Zelensky ka njoftuar shkarkimin e 28 zyrtarëve të Shërbimit të Sigurisë të Ukrainës (SBU).
Lajmi u bë i ditur nga agjencitë vendase, duke cituar fjalimin e presidentit mbrëmjen e 18 korrikut.
“Një lajm tjetër i rëndësishëm në lidhje me Shërbimin e Sigurisë së Ukrainës. Po bëhet auditimi i personelit të Shërbimit, po zgjidhet çështja e shkarkimit të 28 zyrtarëve. Nivele të ndryshme, drejtime të ndryshme. Por arsyet janë të ngjashme – rezultate të pakënaqshme të punës”, theksoi Zelensky.
Më 17 korrik, Zelensky pezulloi prokuroren e përgjithshme Iryna Venediktova dhe shkarkoi kreun e SBU-së, Ivan Bakanov.
Presidenti ia caktoi detyrat e kreut të SBU-së zëvendësit të parë të Bakanov-it, Vasyl Malyuk.
Më 18 korrik, Zelensky paraqiti në Verkhovna Rada (Parlamenti ukrainas) një mocion për shkarkimin e Ivan Bakanov nga posti i kreut të Shërbimit të Sigurisë të Ukrainës.
Kjo çështje do të jetë pika e parë e rendit të ditës në mbledhjen e ardhshme plenare.
