Ministri belg i Drejtësisë Vincent Van Quickenborne është vënë nën mbrojtje të shtuar policore dhe tre të dyshuar janë arrestuar në Holandë pas një “kërcënimi” ndaj zyrtarit, njoftoi të shtunën zyra e prokurorit federal.
Sipas të përditshmes flamande Het Laatste Nieuës, “të paktën” një pushkë dhe shishe të mbushura me benzinë u zbuluan brenda një automjeti me targa holandeze, të parë pranë shtëpisë së ministrit.
Zyra e prokurorisë federale belge tha në një deklaratë për shtyp se tre persona janë arrestuar gjatë natës nga e premtja në të shtunën në Holandë.
Të arrestuarit janë të gjithë shtetas holandezë, të moshës 20, 29 dhe 48 vjeç, sipas zyrtarëve. Është kërkuar transferimi i tyre në Belgjikë.
“Unë dhe familja ime jemi të sigurt. Lufta jonë kundër krimit të organizuar vazhdon. Me më shumë fuqi punëtore dhe burime se kurrë. Ne kurrë nuk do t’i përkulemi dhunës”, shkroi z. Van Quickenborne në Tëitter.
Zyra e prokurorisë federale belge konfirmoi se ishte “informuar gjatë javës së fundit për një kërcënim të mundshëm” ndaj Ministrit të Drejtësisë.
Sipas tyre, hetimi “tregoi shpejt se ky kërcënim duhet të merret seriozisht”.
Ministri është vënë nën mbikëqyrje më të rreptë policore dhe nuk do të marrë pjesë në eventet e ditëve në vijim si masë sigurie.
