Britania e Madhe do të pajiset me dy anije speciale për të mbrojtur infrastrukturën nënujore siç janë kabllot dhe tubacionet, ka njoftuar Sekretari i Mbrojtjes Ben Wallace, pas rrjedhjeve të gazsjellësit Nord Stream në Baltik, të cilat besohet se janë sabotim nga Rusia.
Njoftimi për dy anijet e specializuara me aftësinë për të mbrojtur sigurinë e kabllove dhe tubacioneve u bë nga Ben Wallace gjatë konferencës së Partisë Konservatore në Birmingham.
Ndërkohë autoritetet në Gjermani po përpiqen të përcaktojnë se çfarë shkaktoi rënien e papritur të presionit në tubacionin e gazit Nord Styream 2.
Operatori i Nord Stream 2 tha se presioni në tubacionin nënujor ra nga 105 në 7 bar gjatë natës.
Gazsjellësi në pronësi ruse, i cili synonte të dyfishonte vëllimin e gazit që rrjedh nga Vyborg, Rusi, nën Detin Baltik në Gjermani, sapo kishte përfunduar dhe ishte mbushur me 300 milion metra kub gaz kur kancelari gjerman, Olaf Scholz, e anuloi atë, pak para se Rusia të pushtonte Ukrainën.
Vendet evropiane i kanë rezistuar thirrjeve ruse për të lejuar funksionimin e Nord Stream 2 dhe kanë akuzuar Moskën për përdorimin e energjisë si armë. Rusia mohon ta bëjë këtë dhe fajëson Perëndimin për mungesën e gazit.
Rusia ka ndërprerë furnizimin me gaz për disa vende dhe ka ndaluar rrjedhjet përmes tubacionit Nord Stream 1 nën Detin Baltik, duke akuzuar sanksionet perëndimore për pengim të operacioneve.
Çmimet kanë rënë në javët e fundit pasi Evropa ka bërë përparim në mbushjen e ambienteve të magazinimit për këtë dimër dhe ka ndërhyrë në tregun e energjisë për të mbrojtur konsumatorët.
Analistët thanë se rënia e çmimeve ishte për shkak të një sërë faktorësh duke përfshirë përparimin në mbushjen e objekteve të magazinimit.
