Legjislatura e Rusisë filloi të hënën procesin e miratimit të vendimit të presidentit Vladimir Putin për të aneksuar katër pjesë të Ukrainës në kundërshtim me ligjin ndërkombëtar, një veprim që vjen pasi ushtria ukrainase vazhdon të çlirojë qytetet e pushtuara më parë nga forcat ruse.
Procedura pritet të jetë një formalitet, por do të zgjasë disa ditë. Putini dhe aleatët e tij kontrollojnë efektivisht të dy degët e legjislaturës ruse dhe hapësira për mospajtim politik në Rusi është zvogëluar vitet e fundit.
Dhoma e ulët, Duma e Shtetit, votoi njëzëri të hënën për të miratuar aneksimin, sipas agjencisë ruse të lajmeve TASS. Dhoma e sipërme, Këshilli i Federatës, është planifikuar të mbajë takime mbi këtë temë të martën, raportoi TASS.
Por manovrat brenda sallave të zbukuruara të Kremlinit janë në kontrast të plotë me faktet në terren në fushat e betejës të spërkatura me mbeturina të Ukrainës lindore.
