Deputetja e PD, Jorida Tabaku ka kërkuar që ERE të zhbëjë vendimin që krijon fashën prej 800 KWH, por ERE e ka rrëzuar këtë kërkesë.
“Nuk ka asnjë arsye të rrëzoni kërkesën time që kërkon thjesht heqjen e fashës për mbi 100 mijë familje për rritjen e çmimit e energjise me 5 here me shume.
Mendimi i çdo deputeti është se ERE duhet të mbrojë interesin e konsumatorëve. Pra ERE merr parasysh interesin e qytetarëve.
Kërkesa ime për të revokuar vendimin për krijimin e fashës 800 KWH për mbi 100 mijë familje që do të rrisë çmimin me 5 herë për familjet shqiptare nuk është thjesht një kërkesë partizane dhe populiste.
Kërkesa ime është e bazuar në të dhëna, në realitetin që po ndiqet sot, nga shifrat e tregtimit të gazit dhe çmimit të energjisë në bursën e Hungarisë. Pra është një kërkesë e logjikshme që padyshim duhet të trajtohet nga ERE e cila i shërben qytetarëve dhe interesit publik.
Duke pasur gjithashtu parasysh edhe situatën e vështirë të familjeve shqiptare, gjendjen e mjerueshme të portofoleve të tyre dhe realitetin ekonomik të vendit që edhe nesër pritet të ketë rritjen më të dobët ekonomike.
ERE duhet të rishikojë pozitivisht kërkesën time si deputete e parlamentit për ta zhbërë vendimin që krijon fashën prej 800 KWH”, u shpreh Tabaku.
