Rusia dhe Turqia kanë arritur një marrëveshje për dërgimin pa pagesë të grurit në vendet në nevojë, duke përfshirë Xhibutin, Somalinë dhe Sudanin, njoftoi të premten presidenti turk Recep Tayyip Erdogan, raporton Reuters.
“Presidenti rus Vladimir Putin më sugjeroi gjatë një bisede telefonike që ne duhet të dërgojmë grurë falas në vendet e varfra, duke përfshirë Xhibutin, Somalinë dhe Sudanin. Ne ramë dakord për këtë”, ka thënë Erdogan në një fjalim televiziv.
“Ne do të sigurojmë që anijet me grurë të arrijnë të gjitha vendet në nevojë, veçanërisht Somalinë, Xhibutin dhe Sudanin, të cilat po luftojnë me një krizë serioze ushqimore dhe urinë”, shtoi Erdogan.
Rusia këtë javë iu rikthye marrëveshjes për furnizimin e grurit që lejon Ukrainën të eksportojë përmes Detit të Zi. Marrëveshja e korrikut, e ndërmjetësuar nga OKB-ja dhe Turqia, do të rinovohet më 19 nëntor, tre ditë pas përfundimit të samitit të G20-s në Indonezi. Putin e kritikoi vazhdimisht marrëveshjen.
Presidenti ukrainas Volodymyr Zelensky ka thënë të enjten se vendi i tij nuk do të marrë pjesë në G20 nëse presidenti rus është atje. Putin ende nuk ka konfirmuar nëse do të marrë pjesë në samit.
