Ministri i Mbrojtjes, Niko Peleshi ka deklaruar se situata e përmbytjeve në Shkodër dhe Lezhë është përmirësuar gjatë orëve të mbrëmjes.
Në një postim në Facebook, Peleshi bën me dije se është rikthyer qarkullimi i mjeteve në rrugën nacionale te Harku i Bërdicës në Shkodër. Sipas Peleshit, deri më tani në qarkun e Shkodrës janë evakuuar 318 banorë.
POSTIMI I NIKO PELESHIT:
Lajm i mirë nga terreni. Situata në Shkodër e Lezhë ka përmirësim të konsiderueshëm në orët e mbrëmjes. Por puna po vijon pa ndërprerje, duke mos ulur vigjilencën as gjatë orëve të natës. Forcat e Armatosura do të vijojnë të qëndrojnë në zonat problematike deri në përmirësimin e plotë të situatës.
Është rikthyer qarkullimi i mjeteve në rrugën nacionale, te Harku i Bërdicës në Shkodër. Rreth 318 banorë në qarkun e Shkodrës janë evakuuar. Kemi të gjitha kapacitetet e nevojshme, bashkitë kanë fondet e mjaftueshme për të përballuar situata të tilla emergjencash.
