Rritja e numrit të lidereve femra ka ngecur në mbarë botën, shkruan “Guardian”. Në janar, Jacinda Ardern dha dorëheqjen si kryeministre e Zelandës së Re, duke thënë se “nuk kishte më energji të mjaftueshme” për të bërë këtë detyrë.
Natalia Gavrilita e Moldavisë dha dorëheqjen si kryeministre në shkurt për një seri krizash të shkaktuara nga ajo që ajo e quajti “agresioni rus”. Nicola Sturgeon gjithashtu dha dorëheqjen në shkurt pas më shumë se tetë vjetësh si ministre e parë e Skocisë, duke thënë se ishte “koha” në një fjalim emocionues.
Më pas të dielën, Sanna Marin humbi një garë të ngushtë zgjedhore në Finlandë duke i dhënë fund mandatit të saj si kryeministrja më e re në botë dhe me disa polemika rreth stilit të saj të jetesës që bënë shumë armiq përtej fansave të shumtë.
Të gjithë këta udhëheqës u larguan nga posti i lartë për arsye shumë të ndryshme, por Dr Federica Cazzo, një pedagoge në marrëdhëniet ndërkombëtare në Universitetin La Trobe, paralajmëron se militarizimi në rritje në mbarë botën për shkak të pushtimit rus të Ukrainës mund të sjellë pasiguri për të gjitha gratë lidere në mbarë botën.
Ajo përmend gjithashtu se gratë përballen edhe me ide stereotipe se si duhet të sillen, sidomos nga media. Presionet e pabarabarta nga detyrimet familjare dhe përgjegjësitë e kujdesit sugjerohen gjithashtu si një arsye e mundshme pse mandati i udhëheqësve femra – mesatarisht 2.1 vjet sipas Pew Research, është kaq i shkurtër.
