Ambasadorja amerikane në Tiranë, Yuri Kim, e cila është në fund të mandatit ishte sot në zyrat e SHISH-it për të takuar dhe uruar drejtuesen e re, Vlora Hyseni, që u emërua pak muaj më parë. Në thelb të bisedës ka qenë siguria dhe forcimi i partneritetit me SHBA-në.
“Yuri Kim ka vizituar sot Vlora Hysenin, Drejtoreshën e Shërbimit Informativ Shtetëror, për ta uruar për emërimin e ri dhe për t’i uruar suksese në këtë rol të rëndësishëm.
Të dy ranë dakord për rëndësinë e bashkëpunimit të fortë SHBA-Shqipëri në sigurinë kombëtare dhe inteligjencën.
Ambasadorja Kim shprehu gjithashtu mbështetjen për përpjekjet e reja për të siguruar që Shqipëria të jetë në gjendje të përballojë me efektivitet sfidat” shkruan ambasada e SHBA-së.
