Policia e Fierit njofton se ka konfiskuar një apartament me vlerë 120 000 euro, në pronësi të 43-vjeçari Julian Sulo, i njohur si “Juli i Pashakos” i dënuar më parë për veprimtari kriminale në fushat e narkotikëve dhe krimeve kundër personit.
“Nga specialistët e Seksionit për Hetimin e Krimeve të Drejtorisë Vendore të Policisë Fier, u bë ekzekutimi i vendimit të Gjykatës së Apelit Vlorë, për konfiskimin e një apartamenti me vlerë 120 000 euro, në pronësi të Julian Sulos 43 vjeç, banues në Lushnjë.
Konfiskimi i apartamentit u bë në vijim të veprimeve të thelluara hetimore dhe procedurale të kryera në kuadër të një procedimi pasuror të iniciuar ndaj 43-vjeçarit.
Apartamenti i konfiskuar dyshohet se është përfituar nga veprimtari kriminale në fushat e narkotikëve dhe krimeve kundër personit, për të cilat Julian Sulo ka qenë i dënuar”.
Vijojnë hetimet intensive për evidentimin e pasurive të tjera në pronësi të këtij shtetasi dhe të shtetasve të tjerë të lidhur me të.
