Kryeministri Edi Rama në një intervistë për gazetën italiane “La Stampa” ka folur për pushimet e homologes Meloni në Vlorë. “Giorgia donte të pushonte, e prita në port të hënën, as nuk dola nga makina dhe e çova në banesën time. E lashë atje. Më pas, hëngrëm një darkë me të dhe familjen time” tha ai.
Ishte edhe Tony Blair? “Jo. Ai nuk ishte aty! Unë kam parë shumë fantazime për këtë dhe më shumë – si ajo që ajo nuk erdhi me traget, por me një jaht luksoz, ose se ajo erdhi për një termocentral bërthamor, më vjen keq, por Blair u largua mëngjesin e ardhjes e saj” sqaroi Rama.
“Ajo nuk ka lëvizur që nga e hëna. Vetëm një ditë, me motobarkë për të shkuar në plazhin përballë në Gjirin e Vlorës. Dhe dje, kur e çova në qytet, buzë detit.
Shumë turistë italianë bënë selfie. I thashë që nëse do të matej pëlqimi me pranimin shqiptar, do të ishte 100%. Nuk më ndodh mua. Ajo u përgjigj se unë kam 10 vjet në pushtet, ajo 10 muaj. Por ka një episod tjetër në të cilin mendova: “Ajo është një gjigante”».
Kryeministri foli edhe për episodin që një grup turistësh italianë ikën pa paguar në Berat. “Në mediat shqiptare dhe në TikTok nuk u fol veçse për një grup italianësh që u arratisën nga një restorant në Berat pa paguar. Kur i thashë Giorgias, të gjithë qeshën.
Ajo bërtiti dhe urdhëroi ambasadorin: “Shko dhe paguaj faturën për këta budallenj, të lutem, dhe bëj një deklaratë! Italia nuk mund të humbasë respektin kështu” tregoi Rama.
Por për çfarë biseduan? “Biseduam për projektin e ujësjellësit, të cilin Andreotti dhe Berlusconi e dëshironin tashmë, nga Shqipëria në Puglia.
Kjo do të ishte e rëndësishme. Bëhet fjalë për përdorimin e burimeve në Shqipërinë e Jugut për t’i lidhur ato me Italinë. Pastaj, është menaxhimi i rrjetit hekurudhor në Ballkan, i cili duhet të zhvillohet” tha Rama.
