Gjyqi për vdekjen e të miturës, Jonada Avdia e cila vdiq tragjikisht pasi u përplas me skaf nga efektivi i policisë Arjan Tase gushtin e shkuar është shtyrë.
Shkak për shtyrjen e seancës u bë mungesa e avokatëve të të pandehurve, ndërsa seanca e radhës u caktua më 17 janari 2024.
Gjyshi i Jonadës, Ismet Avdia u shpreh në një deklaratë për mediat se nuk e ka humbur besimin te drejtësia por mendon se seancat po shtyhen qëllimisht për t iu dhënë fajtorëve një dënim minimal.
“Kjo është seanca e tetë, e një gjyqi paraprak që zgjat pothuajse 6 muaj, në një kohë që për 8 muaj prokurorja e nderuar ka arritur të mbyllë dosjen. Ajo u shty sërish sot. Ne jemi shumë të shqetësuar, dua të deklaroj përmes ekraneve tuaja. Ky është një skenar, unë këtë skenar e kam dyshuar, por ai u bë realitet. Ky skenar që krijoi një lodhje për të bind publikun dhe udhëzuesit e lartë të gjykatës se kjo çështje duhet të gjykohet bashkërisht ashtu siç është hetuar. Ata e ndanë dhe kjo ndarje krijon hapësira për gjykim të shkurtuar dhe në fund skenari do jetë një dënim simbolik pas dy vitesh. Ne i besojmë ende drejtësisë, por u bëjmë thirrje organeve të larta të drejtësisë që ta shohin. Tragjedia e Himarës është një pjesë dhimbshme jo vetëm e familjes sonë, por e gjithë popullit shqiptar. Ky është një skenar për ta zbutur dënimin ndaj atyre që e vranë Jonadën”, tha Ismet Avdia.
Nga kjo dosje Gjykata e Vlorës do të dënojë 8 punonjësit e policisë së Himrës për shpërdorim detyre, ndërsa ish-punonjësi i policisë do të dënohet më vete.
