Mijëra tifozë të ngazëllyer të Sportingut u mblodhën në kryeqytetin Lisbonë deri në orët e para të së hënës për të festuar kurorëzimin e klubit të tyre kampion të ligës portugeze për të njëzetën herë në historinë e tyre.
Sporting fitoi titullin e ‘Primeira Liga’ të dielën pasi Benfica humbi 2-0 kundër Famalicao-s, një rezultat që la skuadrën e Ruben Amorimit me tetë pikë epërsi të padiskutueshme në renditje me dy ndeshje të mbetura.
Menjëherë pas humbjes së Benfica-s, makinat filluan festën me boritë e tyre dhe mijëra tifozë u drejtuan në sheshin kryesor të Lisbonës, Marques do Pombal, ku lojtarët mbërritën me një autobus të hapur rreth orës 01:40 të mëngjesit me kohën lokale.
Një nga një, lojtarët u ngjitën në një skenë të madhe të ngritur në shesh, ndërsa këngët optimiste shpërthyen nga altoparlantët dhe tifozët valëvitnin flamuj dhe shalle.
Kapiteni i Portugalisë, Cristiano Ronaldo , i cili luan për klubin e Arabisë Saudite, Al Nassr, shkoi në rrjetet sociale për të uruar Sportingun, ku filloi karrierën e tij profesionale. “Urime kampionë”, ka shkruar ai në Instagram.
