Komisioni Evropian i pezulloi Shqipërisë miliona euro grante për bujqësinë nga programi IPARD në korrik 2023, për shkak të dyshimeve për korrupsion. Shqipëria nuk ka ende një datë për riçeljen e fondeve, por zëvendësministri i bujqësisë Dhimitër Kote pretendon të kundërtën. Në një dalje televizive, Kote tha se fondet do të rikthehen në 2025-ën. Deklarata u përgënjeshtrua nga Komisioni Evropian për Faktoje.
Autoritetet shqiptare janë vënë në lëvizje për të plotësuar kërkesat dhe kushtet që duhet të plotësojnë në mënyrë që vendi të rifitojë fondet e ndërprera për bujqësinë nga Komisioni Evropian, për shkak të dyshimeve për korrupsion.
Mirëpo, teksa Shqipëria nuk e ka ende një afat konkret për rikthimin e fondeve IPARD, zëvendës ministri i bujqësisë Dhimitër Kote pretendon të kundërtën. Gjatë një interviste televizive, Kote deklaroi se programi IPARD III do të jetë funksional vitin e ardhshëm – vit i cili përkon me zgjedhjet e përgjithshme parlamentare. Majde, zëvendësministri lë të kuptohet se procesi i vlerësimit për hapjen apo jo të IPARD III-shit, është normal dhe nuk ka të bëjë me hetimet për korrupsion.
“…Për vitin 2025 ajo skemë do të jetë funksionale. Çdo proces ka kohën e vet, sepse ne përthithëm dy masa IPARD I dhe II. Bëhet analiza e tyre dhe pastaj shpallet për 2025-ën IPARD III,”- deklaroi zëvendës ministri i bujqësisë Dhimitër Kote./Bold News
