Qeveria e Maqedonisë së Veriut shpalli gjendje krize për shkak të zjarreve që po përfshijnë të gjithë vendin. Në 24 orët e fundit janë regjistruar gjithsej 21 zjarre në hapësira të hapura, me shtatë prej tyre që janë aktive.
Presidenti Gordana Siljanovska Davkova ka urdhëruar angazhimin e ushtrisë për shuarjen e zjarreve, veçanërisht në zonën e Negotinit, ku tre zjarre aktive po shkaktojnë shqetësime të mëdha.
Qeveria, e drejtuar nga Hristijan Mickoski, ka vendosur se Ministria e Punëve të Brendshme do të koordinojë forcën policore, ndërsa Ministria e Shëndetësisë do të jetë në gatishmëri për çdo nevojë emergjente.
Deri më tani, janë angazhuar njëqind ushtarë dhe dy helikopterë MI 8/17 për të mbështetur operacionet e shuarjes së zjarreve në malet e rajonit Serta. Situata vazhdon të jetë kritike dhe autoritetet po punojnë në mënyrë intensive për të parandaluar përhapjen e zjarreve të tjera.
