Një ditë më parë u mbyll puna e Komisionit Hetimor për ndërhyrjen në të dhënat e sistemit TIMS, Ervin Salianji që drejtoi për 4 muaj punën në Komision ka publikuar gjetjet që sipas tij faktojnë abuzimet.
Sipas gjetjeve, deputeti i PD teksa i referohet dokumenteve thotë se Ervin Muça nuk përmbushte kushtet për t’u emëruar në detyrën e Drejtorit të Departamentit të IT-së.
“Nga gjetjet e Komisionit Hetimor ka rezultuar se Ervin Muça, me detyrë Drejtor i Departamentit të IT-së në Policinë e Shtetit, së bashku me Drejtorin e Drejtorisë së Sistemeve, Besjon Tanuzaj, dhe punonjës të tjerë të Departamentit të IT-së, kanë kryer një sërë shkeljesh ligjore, duke vënë në rrezik sigurinë e sistemit të dhënave TIMS.
Për hetimin e rolit dhe veprimtarisë së paligjshme të këtyre shtetasve, vlerësojmë se është e nevojshme të kryhet një hetim i plotë, i thelluar dhe i gjithëanshëm nga Prokuroria e Posaçme kundër Korrupsionit dhe Krimit të Organizuar (SPAK).
Kjo e fundit mund të nxjerrë në dritë edhe fakte të reja të paligjshme, ashtu si edhe të identifikojë persona të tjerë, që mund të jenë identifikuar gjatë hetimit parlamentar’ shkruan ai.
