Zjarre të mëdha kanë shpërthyer njëkohësisht në tri zona periferike të Athinës, duke shkaktuar një situatë emergjente për autoritetet greke.
Zjarret janë përhapur në Barnaba, Eretria dhe Megara, duke djegur disa banesa dhe duke shkaktuar vështirësi në frymëmarrje për 10 persona që janë dërguar në spital.
Forcat zjarrfikëse dhe mbrojtja civile janë angazhuar në përpjekjet për shuarjen e flakëve, ndërsa banorët janë njoftuar të jenë të gatshëm për t’u larguar nga zonat e prekura. Për shkak të erës së fuqishme që fryn, përdorimi i mjeteve fluturuese është i vështirë.
Operacionet do të vazhdojnë edhe gjatë natës, ndërsa Atika është vlerësuar me rrezikshmëri 5, niveli më i lartë i alarmit kundër zjarrit.
