Mbreti i Tajlandës ka miratuar zyrtarisht Paetongtarn Shinawatra, një pasardhës i dinastisë politike më të famshme dhe përçarëse të vendit, për t’u bërë kryeministri i ri i vendit.
Emërimi i saj pason një sërë kthesash në politikën tajlandeze gjatë javës së kaluar, gjatë së cilës Gjykata Kushtetuese rrëzoi Srettha Thavisin, paraardhësin e saj nga e njëjta parti Pheu Thai.
Kryeministrja më e re e vendit Paetongtarn 37 vjeç është vajza e ish udhëheqësit të rrëzuar Thaksin Shinawatra. Ajo bëhet gruaja e dytë kryeministre e Tajlandës, pas tezes së saj dhe motrës së Thaksin-it ,Yingluck Shinawatra.
Të dielën, miratimi i mbretit Maha Vajiralongkorn iu lexua asaj nga sekretari i Dhomës së Përfaqësuesve në selinë e Pheu Thai në kryeqytetin Bangkok.
Paetongtarn u ul në gjunjë dhe bëri homazhe për një portret të mbretit, përpara se të mbante një fjalim të shkurtër duke e falënderuar atë.
“Ky është nderi dhe krenaria më e lartë në jetën time. Unë, familja ime dhe partia Pheu Thai e vlerësojmë shumë mirësinë e Madhërisë së Tij. Unë jam e vendosur të kryej detyrat e mia me besnikërinë dhe ndershmërinë time për të mirën e kombit dhe popullit”, tha ajo.
