Nedim Bajrami do të luajë në kampionatin skocez për 3 vitet e ardhshme, pasi Sasuolo ka vendosur ta shesë për 4 milionë euro te Gllasgou Rejnxhërs. Kontrata e lojtarit kuqezi me ekipin e madh skocez është deri në vitin 2027 dhe lajmi është konfirmuar nga vetë klubi në faqen zyrtare.
Bajrami shprehet se është i lumtur që do ti bashkohet klubit të madhësisë së Rejnxhërs.
“Ata janë një klub i njohur në mbarë botën, të cilët kanë fituar shumë trofe dhe kanë konkurruar në një finale evropiane vitet e fundit. Kam pasur disa biseda të mira me trajnerin dhe besoj se Rejnxhërs është lëvizja e duhur për mua në këtë pikë të karrierës sime”, deklaroi Bajrami.
Mesfushori kuqezi luajti në “Euro 2024″ dhe që në 100 ndeshje në Serinë A ka dhënë 11 asiste. Ai ka luajtur në Itali fillimisht me Empolin, për të kaluar më pas te Sasuolo në janar të 2022-shit dhe gjatë kësaj kohe ka shënuar 4 gola në 49 ndeshje me ekipin që ra në Serinë B.
