Ministri i Brendshëm Ervin Hoxha prezantoi Ermal Onuzin si Drejtori i ri i Përgjithshëm i Gardës së Republikës, duke falenderuar paraardhësit Gramos Sako dhe Sami Kuti për kontributet e tyre.
Hoxha theksoi rëndësinë e vijimit të reformave për ta bërë Gardën një trupë moderne dhe profesionale.
“Vizita ime e parë në Komandën e Gardës lidhet me një moment të rëndësishëm, me prezantimin e Drejtorit të ri të Përgjithshëm të Gardës së Republikës, z. Ermal Onuzi, i cili u përzgjodh pas një procesi të hapur konkurrimi, me kandidatura të mira e profesionistë të fushës së sigurisë. I urova zotit Onuzi suksese në detyrën e rëndësishme, duke besuar fort se do të çojë para punët e nisura, për ta kthyer këtë trupë, në elitare”, u shpreh Hoxha.
Ministri Hoxha u shpreh se është e nevojshme që Garda të jetë e efektshme në mbrojtjen e personaliteteve të larta dhe organeve të drejtësisë, duke nënvizuar angazhimin për bashkëpunim me agjencitë ligjzbatuese dhe mbështetje të plotë nga Qeveria dhe Kryeministri Rama.
