Presidenti i Serbisë, Aleksandar Vuçiç, ka paralajmëruar se do të reagojë me “masa serioze” brenda 72 orëve, pas një takimi me të dërguarin e Bashkimit Evropian për dialogun Kosovë-Serbi, Miroslav Lajçak.
Vuçiç akuzoi Albin Kurtin për “sulme brutale” ndaj popullsisë serbe në veri të Kosovës dhe e akuzoi bashkësinë ndërkombëtare për mos përmbushjen e kërkesave të Serbisë.
Në një postim në Instagram, Vuçiç deklaroi se Serbia është e gatshme për dialog, por do të ndërmarrë veprime të forta në përgjigje të situatës aktuale. Ai theksoi se Kurti po përpiqet për shkatërrimin dhe persekutimin e serbëve në Kosovë.
“Do të kemi shumë takime të rëndësishme sepse duhet të luftojmë për pozitën e Serbisë në botë, të kërkojmë aleatë. Ne do të bëjmë gjithçka që është e mundur për atë çështje. Është e qartë që Kurti dëshiron shkatërrimin e persekutimin e popullatës serbe”, ka theksuar ai.
