Ministri i Brendshëm, Ervin Hoxha, gjatë një aktiviteti në shkollën “Kosova” në Tiranë, nënvizoi përpjekjet e qeverisë për të forcuar sigurinë në shkolla. Ai njoftoi se janë shtuar policët me uniformë dhe ata në veshje civile në zonat përreth shkollave, si pjesë e nismës “Paketa e Sigurisë në Shkolla”.
Përveç kësaj, janë instaluar kamera sigurie dhe sisteme monitorimi në hyrjet dhe perimetrin e shkollave për të parandaluar incidentet në kohë reale.
“Përmes ‘Smart City’ synojmë një standard të ri në monitorimin, kontrollin, mbikëqyrjen dhe analizimin e pamjeve të rrugëve, hapësirave të mëdha publike, qyteteve, përfshirë këtu edhe shkollat. Ky projekt do të modernizojë edhe më tej infrastrukturën teknologjike të Policisë së Shtetit”, theksoi ai.
