Një shpërthim ka ndodhur mbrëmjen e kaluar në Zubin Potok, siç konfirmoi zëvendësdrejtori i Policisë së Kosovës për rajonin e veriut, Veton Elshani. Incidenti ndodhi rreth orës 23:30 dhe dyshohet se shkaktoi një zjarr në një ndërtesë të pabanuar dhe të papërfunduar.
Elshani njoftoi se deri më tani nuk ka raportime për të lënduar, ndërsa ekipet e policisë dhe zjarrfikësve janë në vendin e ngjarjes për të hetuar shkakun e shpërthimit. Ai theksoi se ende nuk dihet se çfarë ka shkaktuar incidentin, por autoritetet janë angazhuar për të zbardhur situatën.
Ky incident vjen pas një ngjarjeje të ngjashme që ndodhi javë më parë, kur një granatë dore u hodh në oborrin e një shtëpie në të njëjtën komunë, duke shtuar shqetësimin për sigurinë në rajon.
