Prokuroria e Fierit ka përfunduar hetimet dhe ka dërguar në gjykim 77-vjeçarin Nazif Musai, i akuzuar për “Vrasje për shkak të marrëdhënieve familjare” dhe “Mbajtja pa leje dhe prodhimi i armëve”. Ngjarja ndodhi më 6 mars 2024, në fshatin Çukas i Vjetër, kur Musai vrau vëllain e tij, Aziz Musai, pas një konflikti mbi pronësinë e një rruge.
Sipas hetimeve, konflikti mes dy vëllezërve përshkallëzoi në një përplasje fizike, gjatë së cilës Nazif Musai qëlloi me armë në drejtim të vëllait, duke shkaktuar vdekjen e tij. Prokuroria shprehu angazhimin e saj për të ndjekur penalisht çdo rast që rrezikon jetën dhe shëndetin e individëve. Tani, rasti do të shqyrtohet nga Gjykata e Shkallës së Parë në Fier.
