Federata Shqiptare e Futbollit është gjobitur nga Komisioni i Etikës dhe Disiplinës në UEFA për incidentet e ndodhura gjatë ndeshjes Gjeorgji – Shqipëri, e cila përfundoi me fitoren 1-0 për kuqezinjtë.
Komisioni vendosi një gjobë totale prej 26,875 eurosh për hedhjen e sendeve në fushë dhe për transmetimin e mesazheve jo sportive.
Sipas vendimeve të marra, FSHF do të paguajë 6,875 euro për hedhjen e sendeve dhe 20,000 euro për mesazhet jo sportive. Vlera totale e gjobës duhet të paguhet brenda 90 ditëve nga komunikimi i vendimit.
Federata e Futbollit i fton tifozët të mbështesin Kombëtaren duke krijuar një atmosferë pozitive dhe duke treguar qytetari për të shmangur probleme që mund të dëmtojnë ekipin.
