Një 29-vjeçar, i identifikuar si Aleksandër Senaj (Ndoj), është arrestuar në Mirditë teksa po përgatitej për t’u arratisur ilegalisht drejt Italisë. Ai ishte shpallur në kërkim për krime të rënda, përfshirë armëmbajtje pa leje dhe kanosje.
Gjatë operacionit policor, forcat e sigurisë i gjetën atij një pistoletë Bereta me fishek në fole, gati për të qitur. Arrestimi i tij është rezultat i një hetimi të gjatë nga Komisariati i Policisë Mirditë, i mbështetur nga Drejtoria e Forcës së Posaçme Operacionale dhe shërbimet e DVP Lezhë, në kuadër të operacionit të koduar “THE END”.
Senaj, banues në Dukagjin i Ri, Thumanë, Krujë, kishte një të kaluar kriminale në Itali, përfshirë dënime për vjedhje me armë. Ai është akuzuar për disa veprime penale, përfshirë “shtrëngim me anë të kanosjes për dhënie pasurie” dhe “prodhim dhe mbajtje pa leje të armëve”.
Ngjarja e fundit për të, e ndodhur më 15 tetor 2024, përfshinte një sulm ndaj pronarit të një karburanti në Mirditë, në bashkëpunim me një tjetër person, i cili aktualisht ndodhet në Itali dhe është gjithashtu në kërkim.
Materialet janë dërguar në Prokurorinë e Lezhës për veprime të mëtejshme.
