Mbledhja e Komisionit Hetimor për Shëndetësinë është mbyllur pas orës 2 të mëngjesit, pas një seance maratonë me debate të ashpra mes deputetëve të mazhorancës dhe opozitës.
Ndërkohë që ishte diskutuar kthimi në burg i ish-ministrit të Shëndetësisë, Ilir Beqaj, pasi kishte kaluar mesnata dhe leja e tij kishte skaduar, Beqaj ka hyrë në komision dhe ka përplasur deputetët e PD-së.
Pasi Beqaj iu drejtua deputetëve të opozitës me fjalë dhe gjeste provokuese, Albana Vokshi dhe deputetët e tjerë të PD-së kërkuan që ai të kthehej urgjent në burg. Vokshi e quajti këtë një skandal, duke theksuar se Beqaj po kërcënonte deputetët dhe duke i kërkuar policisë të ndërhynte për ta kthyer menjëherë në qeli.
Pjesë nga debati:
Ina Zhupa: T’i jepet leja zotit Beqaj të kthehet në qeli, atje ku e ka vendin. Kryesia e këtij Komisioni të shqyrtojë mundësinë e pyetjes dhe lejes për datën 14 për Beqajn, si edhe dy dëshmitarët e tjerë Rama dhe Nushi. Për Beqajn për leje, se këto dy të tjerët s’ka nevojë se janë të lirë ende. Shpresoj të jenë sa më shpejt njerëz nëpër burgje. Beqaj të shkojë ku ka vendin. Nëse këta duan të bëjnë show dhe t’i japin një natë liri zotit Beqaj, më vjen shumë keq. Ju lutem që nëpërmjet sekretarisë. Sot është data 14 dhe lejen e kemi marrë për datën 13
(Ilir Beqaj hyn në sallë së bashku me avokatin dhe u drejtohet anëtarëve të komisionit të opozitës)
Albana Vokshi: Kush je ti që hyn këtu, dil përjashta. Grada Policia urgjent të kthejë Ilir Beqajn në qelinë e burgut tani. Dhe guxon të hyjë në atë mënyrë në sallë, urgjent tani, ta fusin në furgon dhe ta kthejnë
Ina Vokshi: Vjen këtu dhe kërcënon deputetët. Na kërcënon neve se çfarë do të themi
Albana Vokshi: Jo me vendim Komisioni, tani shkoni thuaji. E kam liruar që në orën 12 dhe e kemi mbajtur peng aty.
Guxon ai dhe vjen e kërcënon, si nuk flisni asnjëri prej jush.
Edmond Spaho: Ndërprisni mbledhjen, policia ta marrë urgjent. Të kërkohet masë edhe avokatin, gangster, që hyri këtu si trim.
