Trajneri i Kombëtares shqiptare, Silvinjo, foli për rëndësinë e ndeshjes së nesërme me Çekinë, që do të luhet në “Arena Kombëtare”. Ai theksoi se kjo sfidë është “shumë e rëndësishme” dhe se do të kërkojë një përpjekje maksimale nga ekipi “Ndeshja e radhës është gjithmonë më e rëndësishmja, edhe nëse do të ishte radha ndryshe. Ne duhet të shkojmë në fushë në 100%, kemi shanse të mira nëse japim maksimumin,” tha trajneri.
Silvinjo e vlerësoi ekipin çek për forcën fizike dhe taktikat e tyre, duke shtuar: “Ata janë të fortë fizikisht, trajneri i tyre është shumë inteligjent, ka bërë ndryshime të rëndësishme, është një ekip ndryshe.” Megjithatë, ai beson te cilësitë e Shqipërisë dhe avantazhi i tifozëve “Ne kemi një avantazh me publikun tonë, ata kanë një pikë më shumë, ne kemi tifozët tanë.”
Në lidhje me formacionin, ai theksoi se disa lojtarë kanë pasur probleme fizike, por Uzuni nuk është një problem “Uzuni nuk ka probleme, ai është më shumë sulmues i dytë, por arrin të shënojë kur gjen hapësirë.” Silvinjo u shpreh gjithashtu se ndeshja mund të vendoset nga detajet, duke theksuar “Ndeshja është si një derbi, por nesër është ndryshe, do të shkojmë fort në fushë dhe do të provojmë gjithçka.”
Në fund, ai e mbylli intervistën me një mesazh optimist “Lojtarët janë të gatshëm për 100%, nuk ka frikë nga kundërshtari, hyjmë në fushë për të dhënë maksimumin.”
