Stuhi e fortë e quajtur “Bert” ka goditur Mbretërinë e Bashkuar, duke sjellë erëra të fuqishme deri në 82 milje në orë. Sipas raportimeve të mediave britanike, kjo stuhi ka shkaktuar viktimën e parë, pasi një pemë ka rënë mbi makinën e një burri të moshuar, duke i marrë jetën atij. Burri, rreth 60 vjeç, po udhëtonte në drejtim të jugut me një Mercedes të zi në Hampshire, kur pema ra mbi makinën e tij dhe ai u shpall i vdekur në vendngjarje.
Zyra e Meteorologjisë ka lëshuar shtatë paralajmërime të motit të verdhë për erëra të forta, borë dhe shi të dendur, duke paralajmëruar gjithashtu për mundësinë e përmbytjeve në disa zona. British Gas ka këshilluar qytetarët që të grumbullojnë ushqime dhe ujë pasi stuhia do të vijojë të fuqizohet.
