14-vjeçari i dyshuar për vrasjen e 16-vjeçarit Martin Cani dhe plagosjen e mikut të tij, Luis Mecja, ka kërkuar në Gjykatën e Apelit zbutjen e masës së sigurisë “arrest me burg”. Avokati i tij ka parashtruar argumentet për këtë kërkesë, të cilat nuk janë bërë ende publike. Hetimet për ngjarjen vijojnë, ndërsa i mituri është marrë në pyetje nga prokurorët për gati 8 orë. Ai është ballafaquar gjithashtu me disa të mitur që kanë qenë dëshmitarë të ngjarjes.
Martin Cani u godit për vdekje me thikë në një përplasje me autorin pas një diskutimi të shkurtër, pak minuta pas daljes nga shkolla “Fan Noli” në Tiranë. Luis Mecja, i cili mbeti i plagosur në këtë ngjarje, ka kaluar disa ditë në spital dhe së fundmi është transferuar për trajtim në Itali.
