Deputetja e Partisë Demokratike, Jorida Tabaku, ka vazhduar kritikat ndaj Ligjit të Investimeve Strategjike, duke e quajtur atë një shembull të qartë të korrupsionit dhe mungesës së meritokracisë në qeverisjen socialiste.
Në një video të postuar në rrjetet sociale, Tabaku theksoi se ligji, i miratuar fillimisht si një masë e përkohshme në vitin 2015, është shtyrë tetë herë dhe ka favorizuar një grup të ngushtë klientësh të afërt me qeverinë, kryesisht në sektorin e turizmit.
Ajo gjithashtu kritikoi se ligji ka dëmtuar sektorin e energjisë, duke ulur investimet në këtë fushë, dhe ka krijuar pabarazi të madhe ekonomike. Tabaku bëri thirrje për ndalimin e këtij ligji dhe krijimin e një kuadri të ri për tërheqjen e investimeve sipas standardeve evropiane, duke kërkuar një sistem që mbështet bizneset e ndershme dhe promovon konkurrencën.
