Për shkak të kushteve të këqija atmosferike, janë pezulluar lundrimet e trageteve në linjat Vlorë-Brindisi dhe Durrës-Bari, si dhe anasjelltas.
Kapiteneritë e Portit të Vlorës dhe Durrësit gjithashtu kanë ndaluar lundrimin e mjeteve të vogla dhe anijeve të peshkimit, për shkak të forcës së detit që arrin deri në 8 ballë dhe dallgëve që variojnë nga 2.5 deri në 4 metra.
Situata pritet të përmirësohet në orët e para të mëngjesit të 25 marsit, duke mundësuar rifillimin e lundrimeve. Të gjitha mjetet detare duhet të qëndrojnë të ankoruara deri në atë kohë për të shmangur incidente të mundshme.
