Regjisori palestinez Hamdan Ballal, një nga katër regjisorët e dokumentarit fitues të çmimit Oscar “No Other Land”, është arrestuar nga ushtria izraelite pas një sulmi nga kolonët izraelitë në fshatin Susya, në jug të Hebronit.
Sipas dëshmitarëve, një grup prej rreth 15 kolonësh të armatosur sulmuan shtëpinë e Ballalit, duke shkatërruar një rezervuar uji dhe goditur makinat e tij me gurë. Ballal u plagos në kokë gjatë sulmit dhe më pas u arrestua nga ushtria izraelite.
Aktivistët hebrenj amerikanë, që ishin dëshmitarë të ngjarjes, filmuan incidentin dhe treguan se gjaku mund të shihej mbi dysheme pas goditjes së regjisorit. Dokumentari i Ballalit, i cili tregon shkatërrimin e fshatrave palestineze në Bregun Perëndimor, fitoi çmimin Oscar për dokumentarin më të mirë më 3 mars.
Pas fjalimit të regjisorit izraelit Yuval Avraham për të drejtat e palestinezëve në ceremoninë e Oscarëve, tensionet politike dhe sulmet ndaj palestinezëve janë intensifikuar.
