Gjykata e Romës konfirmoi lënien në qeli të 23-vjeçarit me origjinë filipinase Mark Samson të akuzuar për vrasjen e shqiptares Ilaria Sula.
Seanca për dhënien e masës së sigurisë është zhvilluar në burgun ku ai po mbahet dhe gjyqtarja ka rrëzuar të gjitha pretendimet e të riut.
Fakti që policia është ende e përqendruar në shtëpinë e familjes filipinase në kërkim të armës së vrasjes është konfirmim i skepticizmit që ekziston për të paktën një pjesë të deklaratave të studentit të arkitekturës.
Policia tashmë po kontrollon kompjuterin e autorit, së bashku me atë të viktimës, të cilin i riu tentoi ta hiqte nga shtëpia e 22-vjeçares në San Lorenzo vetëm pak orë para krimit.
Dyshimet janë se në kompjuter mund te gjenden shkëmbimet më të fundit të mesazheve, të cilat mund të ndihmojnë në zbardhjen e ngjarjes.
