Zbardhen detaje të reja nga hetimet lidhur me atentatin e 17 prillit në Lundër.
Grupi hetimor ka përftuar ADN mikse pas analizave laboratorike dhe tani po bëhen krahasimet për të identifikuar autorët. Sipas burimeve nga grupi hetimor, ADN-ja është gjetur në disa sende të braktisura në vendin e ngjarjes, si çanta, doreza dhe pinca, të cilat dyshohet se janë përdorur për të prerë telin e rrethimit, ku autorët ishin fshehur dhe kanë përdorur motorin për të ikur.
Hetuesit janë fokusuar gjithashtu në këqyrjen e kamerave të sigurisë, jo vetëm ditën e ngjarjes, por edhe ditë përpara saj. Ata dyshojnë dhe kanë informacione që autorët kanë lëvizur me motor për disa ditë rreth vendit të ngjarjes dhe në zonën e Lundrës, duke studiuar terrenin përpara sulmit.
Grupi hetimor ka marrë të dhëna të rëndësishme dhe po vazhdon analizimin e provave të mbledhura deri tani.
