Një ngjarje tragjike është shënuar këtë pasdite në afërsi të Portit të Shëngjinit, ku është gjetur i pajetë një 37-vjeçar nga Fushë-Kruja. Viktima, me inicialet N.Z., u pikas nga shërbimet e Policisë Kufitare rreth orës 15:40, pranë bregut të detit.
Disa metra larg trupit u gjet edhe një mjet lundrues tip Jet Ski, duke çuar në dyshime se burri mund të jetë mbytur aksidentalisht gjatë lundrimit. Nga vëzhgimet paraprake, në trupin e tij nuk janë konstatuar shenja dhune apo dëmtime fizike. Grupi hetimor vijon punën për të zbardhur plotësisht shkaqet e kësaj ngjarjeje të rëndë.
