Rusia ka akuzuar Ukrainën se ka nisur një tjetër sulm me dronë në natën e dytë radhazi, duke synuar Moskën. Si pasojë, të katër aeroportet kryesore të kryeqytetit rus u mbyllën për disa orë për arsye sigurie, por më vonë ato u rihapën, njoftoi agjencia ruse e aviacionit, Rosaviatsia.
Kryebashkiaku i Moskës, Sergei Sobyanin, tha se të paktën 19 dronë ukrainas ishin shkatërruar para se të arrinin të hynin në qytet, duke shtuar se disa mbeturina kishin rënë në një nga autostradat kryesore që çon drejt Moskës, por fatmirësisht nuk pati të lënduar.
Për momentin, Ukraina nuk ka dhënë asnjë koment lidhur me këtë akuzë. Në të njëjtën kohë, kryebashkiaku i Kharkiv dhe autoritetet e Kievit kanë raportuar sulme me dronë nga ana e Rusisë gjatë natës, ndërsa guvernatori i Odesës, Oleh Kiper, njoftoi se një person humbi jetën nga një sulm me dron në rajonin e tij.
